Maafisa wa Uturuki wamesema kuwa ndege ya
abiria ya Syria ambayo ilikuwa inapita
katika anga yake kutoka Moscow kuelekea
Damascus, kinyume na sheria, ilikuwa imebeba mizigo haramu
Ndege za kivita za Uturuki zililazimisha ndege hiyo ya
abiria kutoka Syria kutua katika uwanja wa ndege wa Ankara
Ndege hiyo iliruhusiwa baadaye kuendelea na safari lakini maafisa wa
Uturuki walisema wamenasa baadhi ya mizigo iliyokuwa imebebwa na
ndege hiyo ili kuifanyia uchunguzi.
Waziri wa mashauri ya nchi za kigeni wa Uturuki,
Ahmet Davutoglu, amethibitisha kunaswa kwa baadhi ya mizigo iliyokuwa ndani ya
ndege hiyo na vyombo vya habari nchini humo vimeripoti
kuwa mizigo hiyo huenda ilikuwa ni vifaa vya mawasiliano.
Awali bwana Davutoglu alisema kuwa uturuki ilikuwa imejitolea kukomesha
usafirishaji silaha wa aina yoyote nchini Syria kupitia anga
yake.
Tukio hilo linajiri wakati Syria na Uturuki zikiendelea kufyatuliana mizinga katika
maeneo ya
mpakani.
Urusi imetaka Uturuki kutoa maelezo kuhusu hatua yake na
kuituhumu Ankara kwa kuhatarisha maisha ya raia
wake. Hata hivyo waziri Davutoglu amesema kuwa Uturuki
itaendelea kuchunguza ndege za Urusi ambazo zinapita katika anga yake.
Hali ya taharuki imetanda kati ya nchi
hizo mbili tangu raia watato wa Uturuki kuuawa wiki jana katika shambulizi la
makombora katika eneo la mpaka wa nchi hizo mbili.
Kwa jibu lake, Uturuki nayo ilishambulia Syria kwa mara ya
kwanza tangu kuanza kwa mgogoro wa kisiasa nchini humo mwaka jana kumtaka
rais Bashar Al Assad kuondoka mamlakani.
Uturuki iliiwekea vikwazo vya silaha Syria mwezi
Septemba
EmoticonEmoticon